صحافة: محمود منسي
مجلة ثورة الموارد البشرية: غادة انتي الأول كنتي محققة نجاح – ومازلتي – في مشروع بتاعك
Happy Candle
بعدها حققتي نجاحات اخرى في مجالات مختلفة زي الكتابة والتدريب وورش نشر الوعي والسوشيال ميديا، ازاي بتكتشفي نفسك وتنمي مواهب جديدة؟
غادة كريم: أولاً.. شكراً أنك فكرتني أني ناجحة لأن كلنا في نص الرحلة بنقف نهنج وبنحتاج حد يفكرنا بالمجهود والمردود والإحساس الحلو بطعم النجاح اللي بيدوب وسط سكة المعافرة
ثانياً.. كل ما بحب حاجة بجربها، التجربة بس هي اللي تقدر تنورلك سكة جديدة أو تقفلها وكل ماتجرب أكتر بتكتشف حاجات كتير عن نفسك ماتعرفهاش وتندهش
لما حد يسألني أعرف ازاي أنا موهوب في ايه بقوله: جرب وهتقع في غرام حاجة أكيد
مجلة ثورة الموارد البشرية: غادة انتي نشرتي كتب كتير وفي مجالات مختلفة، ازاي بتنقي المواضيع؟
غادة كريم: كل كتاب له قصة مختلفة ومن آخر كل طريق بتبدأ حدوتة الكتاب الجديد اللي بعده
أول كتاب كان تجميعة المقالات اللي نشرتها لسنتين في روزاليوسف والكتاب اللي بعده اتولدت فكرته بعد رسالة وصلتني من قارئة أدركت أنها مصابة بالاكتئاب من مقال في “علامات الحب السبعة” وبدأت العلاج ومن هنا الكتاب الثاني “رسائل حريمى جدا” أربعين رسالة بعتهم للستات عن مختلف نواحي حياتهم ولمختلف الأعمار وبعده اتولدت فكرة كتابي الثالث “كتالوج الحب” حبيت أعمل كتاب عن العلاقات بس يبقى دليل للناس في علاقاتها العاطفية وبعده حبيت فكرة الاعترافات في الرابع “مكعب ثلج” لو كل واحد طلع برا مكعبه التلجي وداب الجليد هيشوف عن نفسه ايه والخامس “12 شهر اعترافات” كل شهر اعترافات جديدة
مجلة ثورة الموارد البشرية: هل يوجد خطوات أو آلية معينة بتستخدميها في كتابة الكتب بتاعتك؟
غادة كريم: أهم حاجة الفكرة وبعدين أبدأ في بناء هيكل للكتاب وبعدبن تفصيلة تفصيلة بتتشكل
مجلة ثورة الموارد البشرية: ايه أكتر كتاب مفضل ليكي من الكتب بتاعتك، وايه السبب؟
غادة كريم: كتاب “رسائل حريمى جدا” لأنه ساعد ستات كتير تبقى أحسن نفسياً وقدروا يغيروا حياتهم
مجلة ثورة الموارد البشرية: قمتي بإدارة ورش عمل كتير في مجال المرأة تحت عنوان “ورش كلام حريم مع غادة كريم“، ايه أكتر التحديات اللي المرأة بتواجها وازاي ده بيؤثر على حياتها الشخصية والعملية؟
غادة كريم: أنها مجتمعيا مضطرة.. مضطرة تقبل حياة مش عايزاها ومضطرة تاخد قرارات لصالح ولادها، مضطرة تشتغل حاجة مش بتحبها علشان الحياة غالية، مضطرة لكونها ست مجتمعياً تقبل غلاسة المجتمع الذكوري.. وخارج مظلة “مضطرة” في مطر كتير مغرقها في ضغط نفسي رهيب
مجلة ثورة الموارد البشرية: تفتكري العلاقات الزوجية بتأثر بشكل مباشر على انتاجية الزوج والزوجة في مكان عملهم؟ ازاي ممكن يكون ليهم تأثير إيجابي على بعض؟
غادة كريم: أعتقد أن الانسان المستقر المبسوط في شراكته مع الآخر بيبقى سعيد والسعادة بصورة عامة بتخرج شخص منتج لأنه مش غرقان في تعاسته ومشاكله، الإنسان السعيد عنده بنزين يتحرك من مكانه ويكتشف نفسه ويساعد أشخاص آخرين ويبقى مبدع عموماً ومختلف في الحياة
مجلة ثورة الموارد البشرية: دلوقتي في بعض المؤسسات الدولية بدأ التركيز على نشر الطاقة الإيجابية في مكان العمل، من خلال خبرتك رأيك ايه ممكن المؤسسات تعملوا علشان تحقق الهدف ده؟
غادة كريم: يعملوا وقت مستقطع في نص اليوم لنشاط لطيف الموظفين يعملوه سوا غير الأكل أو الرغي زي التأمل أو محاضرة بسيطة إيجابية أو ملهمة، ممكن كمان استضافة شخصية عامة الكل مهتم يشوفها
تجديد الطاقة في مكان العمل بيجدد الأفكار
مجلة ثورة الموارد البشرية: في ناس كتيرة ممكن يكونوا مش متمرسين في مجال الكتابة بس بيكونوا عاوزين يكتبوا الكتاب بتاعهم علشان مروا بخبرات وعندهم أفكار عاوزين يوصلوها.. أيه نصايحك ليهم؟
غادة كريم: يدونوا كل افكارهم على ورقة الأول وبعدين يرتبوها، ممكن يستعينوا بشخص أكثر خبرة، يحضروا كورس كتابة، يتابعوا فيديوهات على اليوتيوب يعلمهم مهارة ترتيب الأفكار للكتابة وكل ده هيبقى زي تعليم السواقة الأدبية بعد فترة هيمارسوا الكتابة بتلقائية