صحافة: محمود منسي

الشركة صاحبها فاكر نفسه أحسن واحد في الكون بيفهم افتر افيكت المهم يعني يقرر انه ليبسنا في الحيطه مع عميل ويطلع قرفه عليا ويقولي اللي مش بيشتغلوا موشن احسن منك وهو اللي بيوترني ويجي يرزع ويتكلم بطريقه very aggressive عموما البوزشن بتاع الموشن جرافك فاضي عنده الحمد لله علشان فاكر ان برنامج الافتر افيكت آله بتعمل كل حاجه ومن ضمن تنمره بيتنمر علي الناس اللي بيعملها اترفيوا ويجيب ناس مستوها مش كويس وهو شايف البرتفليوا من قبل ما يعملهم الانترفيوا ويجبهم يقلهم انتوا فاشلين ولو هنقبلك هناخدك تريننج

***********************************************

مدير كان بيلبس الناس في بعض عشان ياخد معلومات اكتر منهم ويدي إيحاء لشخص أنه كده بقى يستحق ثقة المدير ويخليهم يتجسسوا على بعض ويخلق عداوة وفي الآخر يسبهم يصفوا حساباتهم مع بعض وده خلق جو عمل منيل ومكان بقى جحر حربيات وكراهية ومفيش مدير بيستمر فيه إلا لو كان حرباية زيهم وحقيقي أكتر مكان طلعت منه ناس مدمرة نفسيا بعد ما بتسيبه

مثال: ممكن مدير يحط على موظف معين عشان ينتقم من مدير اخر

***********************************************

مديرة مثلا تبقى عارفة انك نفسك في ترقية معينة وتوعدك بيها فتفضل تحرق نفسك شغل وفي الآخر متخدهاش وتكتشف أنها بتتلاعب بيكي

***********************************************

تنمر على عامل الخدمات من الموظفين والمديرين، مثلا انزل هتلنا كذا وبعد كده لا مش ده الطلاباه انزل غيرو تاني، مفيش شكرا تسلم ايدك بعد أي خدمة بيقدمها، تريقة عليه مش فاكرة في ايه بظبط بس هزار سخيف جدا

***********************************************

في نوع تنمر أنا بتعرضله من ساعة ما بدأت شغل مع شخصيات multinational ومش عارفة سببه أو ممكن يكون متكرر مع ناس كتير ولا لا، بس في مجالنا بلمسه جدا، أول ما بيعرفوا انك مسلم بيكون في نوع من أنواع عدم الاريحية في التعامل أو التعامل معاك بشكل في توجس (أنت إرهابي يعني ?) أو على الأقل جي من العنصر المتشدد على كوكب الأرض، الغريبة إن ده بيصدر عن شعوب المفروض انها متحضرة و open-minded وممكن ما بتحسش ب flexibility عالية في التعامل لما بتكون عربي بالذات مسلم على عكس مثلا شعوب آسيا، وده بقى بيأثر في الشغل جدا، يا سلام بقى لو لينا زميل لغته مش قوية فبتلاقي التنمر أصعب. ممكن يكون أوسع من كلمة تنمر ويكون عنصرية..

***********************************************

Rejected from companies after passing technical exams due to body arts “tattooing”.

***********************************************

مديرتي كانت بتتنمر عليا ? وتقريباً بسببها مش عايزة اشتغل تاني لحد دلوقتي ?

أنا ثقتي في نفسي مش كبيرة وهي كانت حاسه بدة وكانت بتلعب عليه حلو أوي، طول الوقت تقوللي انتي مش منظمة وبطيئة في شغلك، أنا مكتبي مهرجل بس منظمة جداً في تفكيري وعمري ما كنت بطيئة هي اللي كانت عايزة مليون حاجة تتعمل في نفس الوقت وبالطريقة اللي هي عايزاها، وكنت ببذل مجهود كبير في الحاجة والاخر تقوللي شغلك مش عاجبني وال evaluation كلها انتقاض لحد ماصدقت اني فعلًا عندي مشكلة ولما حد يشتكي من حاجة كانت تعرف كويس أوي تقلب التربيزة عليه، كانت ست بشعة بجد ? مش عارفة بصراحة دة بيحصل في أي شغل وكل المديرين كدة ولا أيه، هي يمكن مش حاجات فظيعة بالنسبة لمشاكل تانية بس كانت عاملالي أزمة نفسية والله ?

***********************************************

شخصيا مش حصلتلي.. بس سمعت عنها كذا مره.. وهي العنصرية في الشغل في الدول الأجنبية.. وخصوصا مع المحجبات.. عنصرية في الدين أو العرق.. لدرجة إني سمعت من كذا حد إنهم بيتضطروا يقلعوا الحجاب عشان يتقبلوا في الشغل..

***********************************************

كنت شغال في شركة في مجال الاتصالات من حوالى ٦ سنين، وقتها كنت كاتب ستاتس الصبح على الفيسبوك نصها

“Make your success a story to tell..!!”

لاقيت مديري داخل على جروب الواتساب بتاع الشغل الساعة ٩ الصبح بعد ما كتبت الستاتس على طول، بيقولي

ماشي يا عبناصر أنا جيلك أشوف موضوع ال success دة وأنا اللى هكتب لك ال story بنفسي

رديت عليه وقتها وقولت له

“when it comes to write your own story, don’t let anyone else to hold the pen..!!” ?

لاقيته اتعصب وبيقولي أنا جايلك دلوقتي

بس بغض النظر عن الموقف دة ومواقف تانية كتير، أنا بحبه وبحترمه.. يمكن هو كان أكبر سبب إني ما كملش في المكان دة وأشق طريقي لأماكن تانية عمري ما كنت أحلم أو أتخيل ان أوصل لها ?

***********************************************

في ٢٠١٦ واجهت موقف صعب لما المدير قرر فجأة أنه يزعق في وشي وقدام زمايلي كلهم، وأما جربت أفهم بهدوء في ايه؟! سابني وأنا بتكلم وراح لمكتبه!! سألت زمايلي هو أنا صدر مني أي حاجة تخليه يتضايق يا جماعة للدرجة دي؟! كلهم نفوا، ساعتها كنت بحاول اهدى وكان قدامي خيار من ٢ ياأكمل وأستحمل بقة أي حاجة حتحصل منه ظلم وقهر نفسي من النوعية دي أو غيرها أو أحفظ كرامتي وأمشي فورا وربنا هو اللي بيرزق.. فوجئت بعدها على طول أنه طالبني في إجتماع أنا وزميلي في نفس الproject  وأما قعدنا نتناقش وجه دوري عشان أتكلم.. قلتله أنا لسة ماقررتش حكمل أصلا في الشركة هنا ولا لا، بس أوعدكم إني مش حتأخر في تبليغكم بقراري. وقد كان بلغتهم بإستقالتي ومشيت.. وربنا عوضني بشغل أحسن والحمد لله..

***********************************************

أتعرضت للتنمر عشان كنت أصغر واحده في ال team وكان كل ما أتكلم في حاجة تقولي المديرة اسكتي أنتي يا (underage)  وتعمل نمرة قدام الولاد تحديدا، هي كانت بتتعمد إنها تعمل كدا قدام أي حد عشان تلفت الانتباه على حسابي وكنت فعلا بسكت مش عارفه ليه.. لدرجة إنها مرة بتتكلم في الموبايل مع واحدة صاحبتها اللي أنا معرفهاش وبتقولها (متخلنيش أقول كلام قليل الأدب عشان في طفلة قاعدة جمبي!) وبصتلي وبتضحك بمنتهي السخافة مع العلم إن لو في task المفروض كان أنا وهي نعمله، أنا كنت بشيل الجزء الأكبر ولو أنا كنت بعمل شير لأي حاجة على الفيس بوك كانت تقولي ال اندر إيدج خربوا الدنيا..

***********************************************

فيما يخص هذا البوست.. أنا عندي تجربة مريرة من العمل كموظف في السوق المصري استمرت ١٢ سنة وأكتر.. اشتغلت وأنا كنت لسة مخلصتش الكلية لقرار شخصي مني اني محتاج ااجلها.. مكنش بتيجي أي مناسبة بين زمايلي إلا لما موضوع التعليم يتفتح والتعامل معايا بفوقية وكأني شخص غير مكتمل، أضف لذلك إنه الإدارة كانت بتتعامل مع المرتب كأنه صدقة أو زكاة مش حق قصاد تعب..

***********************************************

أنا روحت انترفيو مع مدير الأتش أر كان حد شغال فى شركة كبيرة، تقريبا اتكلمنا عن السي-في في عشر دقائق وباقة ساعة الانترفيو بيقنعني ليه انتي مش عايزه تقلعي الحجاب، وفي موقف تاني كنت شغالة في شركة وكان في ١٢ بنت فيها كان في تنمر طول الوقت عليا، سواء شخصيتي أو لبسي حتى لو مفهموش حاجة، بس بجد الناس بقيت قذرة ممكن يشوهوا أي حد نفسيا بدون وجه حق، وعندي مدير في الشغل لو جيت اتكلمت انجليزي يتريق عليا حتى لو نطقت صح..

***********************************************

I worked in an international telecommunications company and the manager hierarchy sucked to the core.. I was the top 5 performers of the department but was told by my direct manager that I suck and that I had to reconsider my place in the company and not to put my hopes up high! On the other hand, my quality coach told me that my performance was amazing by showing me evidence that I was indeed one of the best 5. The first opportunity for being promoted to a different title came around but I did nothing because my self-esteem was crushed.

الحمدلله بفضل ربنا وحسبناتي عليه مفيش بعديها بكام شهر بعد ما سبت الشغل اتمسك لامؤخدة تعاطي في شركة مخدرات واترمن ?

***********************************************

كنت عاوزة اقول مواقف حصلت معايا بسبب التدخين واني تقريبا البنت الوحيدة المدخنة في الشركة وأي واحدة بتدخن بتخبي ده عشان محدش يتكلم عليها بسبب سوابق حصلت في الشركة، بس أنا مفرقش معايا وقولت أنا هدخن عادي محدش ليه حاجة عندي واللي عاوز يتكلم يتكلم، بدأت أول ما كنت بدخل ال smoking room أسمع كلام من بنات معديه ايه ده اللي دخلك هنا بتعملي ايه جوة مع العلم إن في كاميرات في الشركة كلها بشكل غير طبيعي بس ما اهتمتش كل فترة حد يتكلم وأكيد اتكلموا كتير من ورا ضهري، حتي في مرة المدير نفسه دخل الاوضة وأنا فيها وحاول يفتح أي كلام معايا علي السجاير وبشرب ايه تاني بشكل غير مريح بالمرة بس تجاريت مع الموضوع وعملت اني مش فاهمة قصده، في اخر موقف حصل مع الموضوع ده بدأت أنا اطلع على السلم ولأني بطلت السجاير شوية واتجهت لل vape فدخان السجاير الكتير بيأثر عليا، كان عادي في الأول تمام محدش بيتكلم والناس بدأت لما تشوفني بره تتطلع تقف تدخن، وفجأة بدون أي مقدمات حد راح وصل للمدير كلام ان في تجمع على السلم دايما بسبب السجاير وبسببي وراح عامل قرار انه ممنوع شرب سجاير على السلم لكل الناس أنا اتكلمت اني مش هقدر أقعد في السموكنج روم عشان مبطله سجاير فراح مبلغ ال اتش ار اني تمام أقعد على السلم بس مخليش حد يجي يقف معايا! قولت ايه الكلام ده يعني ايه يتحكم مين يقف ولا مين ميوقفش أصلا معايا ده بريك هو ماله، طبعا اتقالي الموضوع مش شخصي ليكي وانه على الناس كلها بس قولتلهم انه شخصي وعيب يحصل كلام زي ده وليه معاني كتيرة أوي الناس فهمتها في الشركة… بس طبعا أنكروا ده ويمكن ده هيكون سبب اني اسيب الشركة في أقرب فرصة برغم انه مالوش أي علاقة بالشغل وكلها حاجات شخصية مريبة بين المدير وموظفين معينة..

***********************************************

في جامعة اشتغلت فيها ٦ شهور فقط من فرط الايجابية اللي فيها.

أحد المسئولين في الكلية اللي اشتغلت فيها تحديدا قالتلي لبسك لا يرتقي بوظيفة مدرس مساعد في الجامعة وان شكل جسمي مش حلو وغيره كلام كتير صدر منها كان بيقتلني..

***********************************************

مديري استغل اني قولتله plan بتاعتي في الشغل وراح قدمها هو لنفسه، أنا عمري متعرضت لحاجة كده دي أول مرة في حياتي..