صحافة: محمود منسي
الناس كانت متخيلة ان المهم في المجال الطبي هو الطبيب فقط ـ لكن اللي مش واخدين بالهم منه انه التمريض هو اللي بيفضل مع المريض بيلاحظ كل عرض وعلامة جديدة في تحسن أو سوء حالته الصحية وانه له دور عظيم جدا في عملية اتمام الشفاء
سلمى صادق
مجلة ثورة الموارد البشرية: ايه سر دخولك للكارير وايه التحديات اللى قابلتيها في بداية المجال؟
المجال الطبي عموما مجال ممتع جدا وأنا من صغري حسيت بشغف للمجال وبدأت ابحث عنه كتير ناس كتير قالتلي المجال صعب ومش هتستحملي اللي بيحصل فيه وشكل الحالات ف الطوارئ والاستقبال وانتي صغيرة مش هتتحملي ده، أنا اخدت كل الكلام ده على محمل التحدي وبدأت بشغفي الدراسة في المجال
أول تحدي قابلته في المجال هو نظرة المجتمع للتمريض في الوقت ده الناس كانت متخيلة ان المهم في المجال الطبي هو الطبيب فقط ـ لكن اللي مش واخدين بالهم منه انه التمريض هو اللي بيفضل مع المريض بيلاحظ كل عرض وعلامة جديدة في تحسن أو سوء حالته الصحية وانه له دور عظيم جدا في عملية اتمام الشفاء
مجلة ثورة الموارد البشرية: ايه المهارات اللي بتميز شخص عن التاني ف المجال ده؟
السرعة في الأداء بشكل متقن لأن مش كل الناس عندها ميزة انها تلحق مريض على بعد دقايق من فقد الوعي وتكون سبب انك تعيده تاني للحياة بسرعه وده بيتمثل في انك تعمل الاجراء صح وتكون مركز جدا في كل حاجة حواليك زي أداواتك كاملة و
cooperative staff without any tensions
وحاجة تانية برضو هي
How to solve problems during work intelligently
مجلة ثورة الموارد البشرية: هل ممكن يكون في كلاشات بين فريق التمريض والأطباء، ايه ممكن يكون سببها؟
ممكن يحصل مثلا كلاش على أساس ان بعض من طاقم التمريض غير مؤهل بنسبة كافيه للعمل أو توضيح أكتر انه على قيد الدراسة أو فترة الامتياز أو حتى حديث التخرج ويبدأ العمل في وقت لا يوجد به افراد اساسيين من الطاقم في وقت حرج فبيسبب ان العمل لا يسري بشكل جيد أو مش بكفاءة عالية
مجلة ثورة الموارد البشرية: في ظل الظروف الحالية هل طبيعة العمل في مجال التمريض متغيرة مع الكورونا وايه المراحل اللي بيمر بيها المريض وازاى بتتعاملوا في كل مرحلة من المراحل دي؟
طبعا اتغيرت وأصبح الأمر شبيه بحالة الطوارئ وأصبحت كل الفرق الطبية على استعداد لاستقبال الحالات المصابة بكورونا وتم توفير الواقيات الشخصية في جميع اقسام المستشفى وتم تدريب الفرق على كيفية لبس وخلع الواقيات بطريقة صحيحة حسب تعليمات مكافحة العدوى اما بالنسبة للمراحل اللي بيمر بيها المريض خلينا نعتبرها الأعراض اللي بيحس بيها المريض على الاغلب بيكون تكسير في الجسم وصداع نصفي مؤلم جدا وارتفاع درجة حرارة الجسم عن 37.5 درجة وبيحصل ضيق في التنفس وجفاف في الحلق وبعض الاعراض اللي بتصيب الجهاز الهضمي زي الاسهال مثلا وحاليا بيتم معالجة الأعراض ومش لازم كل المرضى يكون عندهم نفس الأعراض لا ساعات بيكون تلت أو أربع اعراض متجمعة ف مريض أو عرضين فقط
بالنسبة لدورنا في المرحلة دي هو اول حاجه اننا نطمن المريض انه هيكون كويس في أقرب وقت ممكن واننا بنحاول بقدر الامكان نكون سبب في شفاؤه بجانب طبعا التحاليل اللازمة له والأشعة والمسحة اللي بتأكد لنا المريض ده ايجابي ولا سلبي وتوزيع كورس العلاج المناسب له على حسب الاعراض اللي حاسس بيها
مجلة ثورة الموارد البشرية: كيف تم تأهيلكم للعمل في نطاق الحجر الصحي وايه هيا التدريبات اللى لو كنتم اخدتوها كانت هتساعدكم أكتر في شغلكم؟
أولا احنا اخدنا دورة تدريبية في كيفية التعامل مع مريض الكورونا من أول معرفة أشكال الواقيات الشخصية المختلفة وكيفية ارتدائها وخلعها بالطريقة الصحيحة على حسب تعليمات مكافحة العدوى بمنظمه الصحة العالمية واتعلمنا ازاي نحط خطة نشتغل عليها في نطاق الحجر في المستشفيات
اظن ان من اهم الدورات اللي مفترض تكون في خطة مواجهة الفيروس عموما سواء في نطاق العمل مع مرضى الكورونا في المستشفيات أو خارجها هيا كيفية مراعاة شعور المريض لان نفسيه المريض بتساعد على تحسن حالته الصحية بنسبة كبيرة فمن وجهة نظري اننا لازم نتعلم كلنا ازاي نساعد المريض نفسيا انه يقدر يتخطى المرض ده
مجلة ثورة الموارد البشرية: هل تم اصابة ناس من فريق التمريض وكيف تم التعامل معها؟
للأسف تم اصابه بعض الأشخاص من الفريق المعالج ودة أمر وارد انه يحصل بسبب بعض الأخطاء اللي ممكن تحصل في عدم توخي الحذر اثناء خلع الواقيات الشخصية وما شابه
لكن تم عزل الزملاء اللي اتصابوا وتم بدأ عمل تحاليل ومسحات لهم وبدء كورس العلاج لهم حسب الأعراض وهكذا
مجلة ثورة الموارد البشرية: ايه أكتر الحاجات اللي بترهقكم في شغلكم أيا كان صحيا أو نفسيا أو عقليا؟
أحيانا اللي بيرهقنا نفسيا هو حالة المريض اللي بنحاول بكل طاقتنا اننا ننقذه من الألم والمرض اللي هو فيه وبنتابع معاه من أول ما بيدخل المستشفى مرورا بالعناية المركزة وبنحاول نوفر له أكياس الدم والبلازما اللي محتاجها مثلا وبيصارع الألم بعدها وبنكون مقدرين كل الألم ده وللأسف مبيكملش حياته والأمر بيكون مسألة قدرية بحت وطبعا على الجانب الاخر ضغط الشغل نفسه في المستشفيات الحكومية بيكون عالي جدا وعدد الحالات الكبير لما بنشتغل معاهم بننسى نفسنا وساعات مبناكلش كويس مثلا ومبنهتمش بالتغذية السليمة اللي تدينا الطاقة الكافية اللي نقدر بيها نكمل شغلنا ـ أحيانا ده بيعود على الفرق الطبية عموما وبيأثر على صحتنا بالسلب للأسف لما ناخد عدد نبطشيات كتير دة بيخلينا مرهقين جدا وممكن يأثر على كفائه الشغل نفسه فبنحتاج نفصل أو ناخد بريك يخلينا نشحن طاقتنا تاني عشان نقدر نواصل مسيرة شغفنا واختيارنا للمجال نفسه 🙂
مجلة ثورة الموارد البشرية: ايه الحاجات اللي ممكن تحصل عشان تساعدكم في صحتكم النفسية والجسدية وايه الحاجات اللي لو اتغيرت تخلي شغلكم أحسن؟
أظن ان من أهم الحاجات اللي ممكن تساعدنا في استعادة صحتنا وقوتنا في العمل هو تخفيف عدد النبطشيات في الشغل وتظبيط الاجازات وزيادة عدد العاملين بالمجال وده هيضمن كفاءة عمل كويسة جدا وهيكون سبب في شفاء عدد كتير من المرضى
وهيضمن مستوى صحي بجودة عالية وطبعا لازم يكون في تجديد وعرض لكل ما هو جديد في المجال زي ما حصل قبل كده واخدنا كلنا دورة كيفية السيطرة على الحريق ودي حاجة فعلا كنا محتاجينها جدا
من الحجات المهمة جدا اللي مش كتير واخد باله منها هيا نظرة المجتمع للأطقم الطبية لأن ده بيأثر بنسبة كبيرة جدا على تقديم مستوى أفضل للرعاية الصحية
مجلة ثورة الموارد البشرية: هل بتلاقي وقت في روتين يومك تعملي الحاجات اللي بتحبيها؟
“Great things never come from comfort zones.”
دي عبارة اخدتها كمبدأ في حياتي
ان فعلا الحاجات أو الانجازات العظيمة مش بتيجي أبدا وأنا مريحه وكسلانة
في حاجات أساسية في روتين يومي زي قراءة الكتب مثلا ومشاهدة حلقات ل تيديكس، والتمارين اللي بعملها ف البيت، اختيار الأكل الصحي المناسب ليا
بجانب بقا اني بتعلم لغة جديدة ومؤخرا اكتشفت ان التعليم الالكتروني ممكن فعلا يكون أكثر فاعلية واستفادت منه كتير جدا
ساعات مثلا أصور صورة حلوة واشيرها مع أصحابي كنوع من أنواع المحافظة على دائرة الصداقة اللي خارج نطاق العمل بتاعي
بعمل مثلا تطوير للمعلومات بتاعتي في مجالي ولو اتعلمت حاجة جديدة مثلا بروح ادور عليها أكتر وأتفرج على فيديوز عنها وأفهمها كويس جدا
أنا بحاول بكل الأشكال اغير من شخصيتي للأفضل بأخلق وقت لقراية كتاب جديد أو لعمل اكلة جديدة حتى وأنا في المواصلات مثلا
اهم شيء هو اني أمشي ورا الشغف بتاعي، لأن ده اللي هيخليني أوصل للي أنا عايزاه وهيخليني أنجح وهيفتحلي أبواب كتيرة جدا بالسعي في الطرق دي
مجلة ثورة الموارد البشرية: نصايحك ايه للناس اللي حاسة انها مصابة ومش قادرة تروح المستشفى؟
أول نصيحة هيا الاهتمام بالنظافة الشخصية بتاعتهم والتزام البيوت وعدم الخروج الا للضرورة
غسل الايدين لازم يكون أكتر من مرة في اليوم بعد كل عمل بتعمله ولو خرجت برا البيت لازم تلبس الماسك ويكون معاك كحول ايثيلي 70% سواء جيل أو سبراي واي تعامل مع أوراق مالية أو تعامل شخصي مع اي فرد برا البيت لازم تستخدم الكحول بعدها مع مراعاة المسافة الآمنة بين الافراد
واتمني السلامة للجميع
شكرا جدا يا سلمى على الإخلاص في عملك والمقابلة الصحفية الهامة دي