صحافة: ياسمين رجب
عن بولا سالم: يوناني مصري، مصور وكاتب وBlogger، عنده أ‘مله الخاصة، بس الحقيقة هو شخص بيحب النجاح وبيحب تعددية المجالات عشان كدة هتلاقي له بصمة في كل حتة
– بولا سالم مبدئياً كدة عرّفنا إنت درست أو بتدرس إيه؟
بولا سالم: دراستي مرت بمراحل الحقيقة. أنا أول ما إتخرجت من ثانوي دخلت آداب إعلام قعدت سنة وبعدين حوّلت بعد الترم الأول إجتماع. بس ده جامعة بيروت مش إسكندرية
– ماكنش ليها أي دور مساعد خالص طبعاً في شُغلك أو كدة؟
بولا سالم: خالص. الفكرة كانت كلها في أهلي عشان الشهادة وكدة. الفكرة كلها أصلاً إني كنت عايز أدخل فنون جميلة بس لإني مش “بتاع مذاكرة” ماجبتش مجموعها. كان الموضوع في الأول ماشي طب أخد كورسات أو أسافر أدرس في المجال ده بره مصر بس أهلي قالولي لأ إدخل هنا أي حاجة عشان كنا إستقرينا في مصر وكدة ونبقى كلنا في مكان واحد فإدخل جامعة بيروت وبعدين إعمل اللي إنت عايزه. في بيروت بتتخصصي من أول سنة فأنا إتخصصت إعلام وكنت من الدحيحة اللي بيطلعوا الأوائل على الدفعة بس ماكنتش حاسس إن ده أنا، مش لاقي نفسي أو مش شايف نفسي فيه عشان كانوا بيعاملونا على إننا مذيعين وكدة وده مش طموحي خالص
– والتصوير؟ بدأ إزاي؟
بولا سالم: وأنا في تانية جامعة رجعتلي تاني فكرة فنون جميلة وكدة فطلّعت ده في إني أحضر ورش ليها علاقة بالرسم عامةً عشان أنا أصلاً بدأت بالرسم مش التصوير. حضرت ورش وعملت معارض وقلت خلاص ده الكارير بتاعي وكدة. بعدها بدأت أصور أو تقدري تقولي بلعب بالموبايل كدة كهواية
– إمتى بدأ يبقى مهنة أو وظيفة؟
بولا سالم: في رابعة جامعة بدأت أصور وأعمل حاجة. بدأت Fashion Photography
– الفترة اللي من تانية لرابعة جامعة إتطورت إزاي في التصوير؟
بولا سالم: كنت بعمل اللي أي شاب بيعمله في سن الجامعة بخرج وباكل وبتفسح بس كنت شبه بصوّر كل حاجة بعملها. السبب كان واحدة صاحبتي من اليونان كانت مريضة بالسرطان وكدة وكان نفسها تزور مصر وماعرفتش فكانت دايماً تطلب مني أصورلها كل حاجة هنا. أنا كنت بصوّر الطريق والأماكن والناس وكنا دايماً على إتصال لغاية ما إتوفت بس أنا إستمريت في التصوير لأنها كانت دايماً تشجعني وتمدح في الصور وكدة
– بدأت إزاي بقى؟ بايدج على الفيسبوك وكدة برضة؟
بولا سالم: أه، بس ماكنتش تصوير بس. كانت تصوير ورسومات وكل حاجة. كانت للفنون عامةً. وبعدين والدي جابلي كاميرا ديجيتال الصغيرة دي هدية لعيد ميلادي فبدأت أصور بيها. وأول شغل ليّا في التصوير كان مصنع يوناني فاتح في مصر ساعتها وكانوا عايزين يصوّروا الـLook Book بتاعهم وكانوا مجهزين الدنيا وجايبين عارضة أزياء وأنا داخلهم بكاميرا ديجيتال حتى هما في الأول كانوا فاكرين إني بهزر وبدأت تصوير ودي كانت أول فلوس تدخلي من التصوير. الفلوس اللي خدتها روحت جبت بيها كاميرا. هما أصلاً ماكانوش مصدقين إن الكاميرا الصغيرة دي ممكن تطلع شغل شكله كويس بس الحمدلله
– طيب إنت أصلاً بقى بتعمل كام حاجة؟ أنا قعدت فترة مش عارفة أعمل أسئلة للإنترفيو دي بسبب إن مالكش مجال محدد أو كدة
بولا سالم: هاها هو بدأت بتصوير الموضة وبعدين تصوير أفراح وبعدين مصور صحفي وموضة في مجلة سبع أيام. كل ده لحد دلوقتي. قبل ستافيلي فتحت إستودو وبعدين قفلته لإني حسيت نفسي هقلب على ستايل إستوديوهات وكدة. وبعدين ستافيلي قعدنا تقريباً سنة. وبعدين عملت مشروع صغير جوة ستافيلي اسمه “I Love Chocolate” كان للحلويات بس. وبعدين الويب سايت اللي هو مصنف Life Style Blog وبعدين وكالة الرحلات بتاعة ميرنا الهلباوي
– طيب واحدة واحدة. ستافيلي. بدأت الفكرة منين؟
بولا سالم: الموضوع بدأ على القهوة.كنا مجموعة صحاب قاعدين وكل واحد فينا معاه مبلغ معين وعايز يعمل به حاجة. وطلعت فكرة نعمل كافية وكله إتحمس للفكرة. في الأول بعضنا كان فاكر إنه هزار أو كلام وخلاص. فجأة لقينا واحد من صحابنا تاني يوم نازل يدوّر على أماكن فغيره إتشجع وكلنا بدأنا نشتغل على الفكرة
– مين كان بيدير المكان؟
بولا سالم: بُصي. هو كل واحد فينا كان له مجال متخصص فيه وهو اللي بيديره وماحدش بيتدخل فيه، فاهماني؟ في مرحلة التوضيبات وقبل ما نفتح كنت أنا ماسك أي حاجة ليها علاقة بشكل المكان والديكور واسمه والتصوير وشكل المنيو. كان معانا شريكة تخصصها الأكل والوصفات وقعدت تجرب حاجات كتير لأنها بتحب المجال ده. شريك تاني كان تخصصه التعامل مع المهندسين والعمال أو الصنايعية. فكل واحد كان ماسك حاجة لحد ما فتحنا الكافية فبقينا تلاتة في الإدارة بس وكنت أنا واحد من ضمنهم. طبعاً التخصصات إختلفت. واحد منهم كان ماسك الحسابات والأمور المادية بشكل عام والورق والتصاريح. واحد تاني كان ماسك اللي شغالين في الكافية بشكل عام وأنا كنت ماسك التسويق والسوشيال ميديا والـcustomer يعني لو حصل مشكلة أو سوء تفاهم أنا اللي بتعامل يعني
– طيب في إختيار العاملين في المكان. مين كان بيدير أو مسئول عن الموضوع ده؟
بولا سالم: إتنين معانا بس أنا كنت ببقى موجود. بُصي إحنا كلنا بنبقى موجودين يعني بس الفكرة إننا مش بنناقشهم في قرارهم ده كان قصدي بعدم التدخل يعني. بس كان فيه شروط أساسية يعني مش عايزين حد بيتكلم إنجليزي كويس أوي بس على الأقل يكون إسلوبه كويس و ذوق. شكله كويس وريحته كويسة. هتستغربيني بس أنا كنت ببُص على الضوافر بس أنا عندي مشكلة في الحتة دي. عنده قبول للإنتقاد وبيعرف يتعامل
– كان عندكوا مشكلة في الـCVs بتاعتهم أو كدة؟
بولا سالم: هو بصراحة يعني فكرة الـCV أصلاً مش مهمة أوي هو مجرد منظر وماحدش بيركز فيه أوي. كان عندنا الأهم التعامل والطريقة فكانت الأولوية للإنترفيو طبعاً. الفكرة إن الشركات عامةً أو الناس اللي طالبين ناس تشتغل مش هتمشي ورا كل واحد تتأكد من إن كل كلمة في الـCV صح أو إنه فعلاً إشتغل في المكان ده من كذا لكذا. ده سبب إنه بقى شكليات من وجهة نظري. إحنا كافية فكان أهم الحاجات بالنسبة لينا الإحترام يعني والحاجات اللي قلتهالِك. والنظام طبعاً كان من أهم الحاجات اللي نجحتنا يعني كان في مسئول عن كل مجموعة في المطبخ مثلاً أو في طقم الكباتن وكدة ولو حصل مشكة الكبير بيتحاسب قبل الصغير
– طيب. الويب سايت. ده أول واحد تعمله؟ وإيه اللي جابلك الفكرة؟
بولا سالم: أه أول واحد. الفكرة كمان إني بحب أكتب جداً بس أنا غير مؤهل للكتابة الصحفية يعني أو مش بعرف. فدي كانت الفكرة إني أعمل بلوج لكل حاجة تاكل فين وتلبس منين وكدة. بس بعدين حسيت إنه ممكن يكون سطحي مثلاً أو كدة وأنا كنت عايز حاجة تبقى حافز لأي حد عايز يبدأ مشروع صغير أو ينجح في حاجة بيحبها فعملت جزء اسمه Day With.. لأي حد نجح في أي مجال في وقت قصير. في جزء تاني اسمه Big Girl ده للناس اللي جسمها ضخم ومتقبلين نفسهم. بس كانت الفكرة الأساسية إني أعمل جزء للبنات بشكل عام لأني ماليش في المجال ده. و فيه Pola Salem ده جزء لكتاباتي، وWhere To Go وStyle Guide والفترة الأخيرة زوّدنا Relationship Goals وقريب هيبقى في Transformation ده للناس اللي كانت تخينة وخست. أهم حاجة بالنسبة لي إنه يبقى واقعي يعني ناس حقيقية وعملت فرق في حياتها أو حياة شركاء حياتهم
– وكالة الرحلات
بولا سالم: هي أصلاً بتاعة ميرنا الهلباوي كانت في الأول عايزة تعملها للناس اللي تحب تسافر لوحدها وفي نفس الوقت تستمتع. وبعدين مع مشاكل السياحة الشغل وقف لمدة سنة تقريباً. من فترة قريبة كنا قعدين وقررنا نستغل الأماكن اللي في مصرالأول. بس إهتمامنا مش بالفسح والشوبينج وكدة. إحنا شغالين على اليوجا والـmeditation. وده اللي مميز يعني في Columbus
– طيب أخيراً بقى قولي مين الـrole models بتوعك
بولا سالم: ياه على السؤال هما كتير جداً يعني بس ماشي. أنا بحب يوسف شاهين لإنه مش مخرج بس كان بيفهم في الرسم والموسيقى والرقص والمونتاج والتمثيل فمافيش فيلم بتاعه تلاقي فيه تفصيلة بايظة أو مش في مكانها. مين تاني؟ إسعاد يونس. إسعاد يونس بتمثل وبتقدم برامج راديو وأكبر شركة إنتاج ومذيعة. أنا دايماً هتلاقي الـrole models عندي ناس بتعمل حاجات كتير. بحب كمان نوال السعدوي ساعات أه مش بتفق مع كل أفكارها بس هي مش قرآن يعني بس لأ هي نادت بحاجات كتير مهمة زي ختان الإناث قبل ما سوزان مبارك تتكلم عنه
– بولا أنا سعيدة جداً بالإنترفيو دي فعلاً
بولا سالم: وأنا كمان
https://www.instagram.com/polasalem/
https://www.facebook.com/POLA-SALEM-photography-142581559089253/?__mref=message
https://www.facebook.com/stafilicafe/?fref=ts&__mref=message