صحافة: محمود منسي
“لما بلاقي شخص متحمس للفكرة أكتر مني أو مؤمن بالقضية، ده بيبقي أول حاجة بتخليني عايزة أشتغل مع الشخص ده. مستحيل حد يوافق إنه يعمل مجهود في حاجة ويخصص وقت ليها ومفيش فلوس ومفيش أي مقابل ومفيش حتي ضمان للنجاح إلا لو مؤمن بالفكرة..“
مها محمد
1-مها انتي أشتغلتي في المجال التطوعي كتير، وكنت بتديري الفريق بتاعك. ايه أكتر اسلوب شباب الجيل الجديد بتفضله دلوقتي في الادارة والشغل؟
في 2015 كنت رئيسه فريق في نموذج الإتحاد الأوربي اللي بيتعمل كل سنة في مكتبة اسكندرية ودي كانت تالت سنة ليا اشتغل في العمل التطوعي بس مكنتش فاهمه ايه اللي بيخلي ناس تشتغل من 9 ل9 في مشروع من غير مياخدوا مقابل مادي. بعد ما اشتغلت شغل بمقابل مادي ابتديت أفهم ليه البعض منا بيدي مجهود أكبر في العمل التطوعي وهو اننا بنحب اكتر نشتغل في حاجه بتغيرنا وبتدينا كمان فرصه اننا نغير وأعتقد ان كل اللي خرجوا من العمل التطوعي عندهم مشكله في الروتين اللي موجود في العمل العادي وحاسين بفرق كبير.
2-ايه تعليقاتك السلبية عن الشغل المدني في مصر؟
العمل التطوعي زي أي حاجة فيها سلبيات وإيجابيات، لكن العمل التطوعي نفسه كمشاريع حتى لو كانت فاشلة فهي بطلع منها كوادر مروا بتجارب وعندهم خبرة كبيرة لأن التعامل في فريق بيدي خبرة التعامل تحت ضغط بيدي خبرة وحجات تانيه كتيرة.
3-في مقالات كتير بتتكلم ان في عنصرية ضد المرأة في مجال العمل، هل العنصرية دي موجودة وسط جيل انهردة في مجال العمل المدني؟
العنصرية ضد المرأة موجودة في كل مكان لكن مش موجودة بشكل كبير في العمل التطوعي، بس رغم انها مش موجودة بشكل كبير فأنا وبنات كتير كانوا ماسكين مشاريع مرينا بتجارب ان في ولاد كتير بيرفضوا فكرة إن “بنت تبقي رئيستي”. لما بتحصل حاجه زي كده بتعامل formal مع الشخص ده وبحاول يبقي الإقناع بشكل عملي ومفرضش رأي وخلاص وأعتمد أكثر علي الإقناع.
4-انتي عندك مشروعك الخاص اللي بيناقش قضايا مجتمعية من خلال أشكال فن مختلفة مثل التصوير والموسيقى والتمثيل، ممكن تحكيلنا أكتر عن المشروع ده؟
مشروع ART HAS NO PLACE أو الفن ملهوش مكان بتعبر عن معاناة كل الفنانين اللي في المحافظات اللي مش قادرين يوصلوا صوتهم. مكناش قادرين نجيب كل أنواع الفنون فاختارنا ال Drummers لأن الدرامر هو اللي بيبقي ماسك إيقاع الفريق ومع ذلك قاعد ورا ومحدش شايف ومحدش عارف مدي صعوبة الآلة بتاعته.
5-علشان تنفذي الفكرك اللي في دماغك بتكوني محتاجة فريق بيتكون من مخرج ومصور وموديلز…. من خلال خبرتك في الأتش أر ازاي بتختاري كل واحد منهم وايه المعايير وإزاي بتختبريها؟
لما بلاقي شخص متحمس للفكرة أكتر مني أو مؤمن بالقضية، ده بيبقي أول حاجة بتخليني عايزة أشتغل مع الشخص ده. مستحيل حد يوافق إنه يعمل مجهود في حاجة ويخصص وقت ليها ومفيش فلوس ومفيش أي مقابل ومفيش حتي ضمان للنجاح إلا لو مؤمن بالفكرة. فعلشان أنفذ الفكرة الأول بأعرضها على ناس كتير علشان أشوف ردود أفعالهم.. أحياناً بأقول فكرة لشخص وهو يكملهالي ويقترح أفكار.
6-ممكن تحكيلنا موقف أو مشكلة واجهتك مع فريق العمل وإزاي اتعاملتي معاها؟
أنا إشتغلت في مشاريع كتيرة جداً وإتعلمت إن التعامل في عمل جماعي صعب جداً، أحياناً بيكون سوء التفاهم أسوأ شيء ممكن يحصل وأنت بتشتغل وممكن يؤدي لفشل المشروع بشكل كامل.. بس أنت المفروض تحاول لحد آخر وقت إنك تتجنب سوء التفاهم، ولو حصل فأنت المفروض تواجة الموقف وتحلوا علشان الموضوع مايفشلش. فكل مشروع بدأت فيه في أشخاص إنسحبت في البداية وده بيؤثر على المشروع بشكل كبير.. الفكرة انك تكمل لأنك مؤمن بفكرة فلازم تنفذها مهما حصل. كان ليا مشروع زمان شخص عطاني أربع مواعيد ومجاش ومع إنه شخص مهم جداً وكنت متمسكه بالشغل معه إلا اني إنسحبت لأنه وقتي بيضيع ورغم إن الإعتذار للشخص بالأهمية دي كان صعب بس كان لازم.
7-ممكن تحكيلنا على موقف تاني بقا كل ما بتفتكروه تضحكوا؟
هو أكتر حاجة بضحك هي ردود الأفعال المريبة على أي مشروع. في project no color واحد بعتلي رسالة قالي متزعليش إنك سمرا دي خلقة ربنا وبعدين الحلاوة حلاوة الروح. أنا ضحكت لأن الرسالة لطيفة بس هي عنصرية بردوا ودي فكرة المشروع أصلاً.
8-في ناس كتير بتحترم الفن بس مش بتعتبره كارير، ايه وجهة نظرك الشخصية في ده؟
تقريباً فنانين كتير أهلهم مش بيدعموهم بسبب النظرية دي، وشايفين إن دي تسليه مش حاجة تعملها طول حياتك… أعتقد ان فنانة صديقة ليا قالت انها دفعت فلوس كتير أوي في اللوحات الفنية اللي بتعملها وعمرها ما أخدت مقابل، بس هي مبسوطة وهي بتعمل ده لأنها عارفة إنها لازم تدي الفن كتير أوي علشان تاخد قدام وحتي لو ماخدتش فهي مبسوطة.. ف الفن ممكن يكون كارير بس ميكونش ده الهدف الأساسي من دخولك في المجال لأن لو تحول لهدف هتنسي حاجات كتير أوي في النص.
9-في ناس كتير حالياً بتعمل كذا حاجة في نفس الوقت وممكن يكون ملهمش علاقة ببعض، زي شغلك كدة يا مها، في ناس بتعلق اننا لما بنعمل كدة بنشتت نفسنا، ايه رأيك؟
صاحب بالين مش كذاب، صاحب بالين ذكي وقدر يعمل خطة ليومه.. صاحب بالين عنده شغف وعنده وقت مش بيضيعوا وأحسن من اللي مبيعملش حاجة خالص.
10-انتي كنتي بتدرسي علاقات عامة، وبتشتغلي دلوقتي في ال copywriting، اللي يعتبر مجال أساسي في كل شركة دلوقتي. ممكن تدينا سر من أسرار مهنتك ازاي تكوني متميزة في المجال ده؟
إبدأ أي فكرة حتي لو مش جاهزة في دماغك وهي هتوضح قدام وهتبان أكتر وأنت بتعملها. بقدر الإمكان حاول إنك تبقي مبدع مش مقلد وإنك تعرف الجمهور اللي أنت عايز توصلوا وتعرف هو بيفكر إزاي علشان توصل لهدفك.
11-ايه أكتر حاجة بتحبطك؟ وايه أكتر حاجة بتستخدميها علشان تشجعي نفسك لما بتكوني محبطة؟
اكتر حاجه بتحبطني الأشخاص، أحياناً حد يجي ويقولي أنتي بضيعي وقت أو أعملي مجهود في حاجة بتجيب فلوس، بضايق لأن هما صح أنا مش بوصل لفلوس من اللي بعملوا، بس في حاجات أهم من الفلوس وهي اللحظة اللي بتشوف الحاجة قدامك كاملة والفكرة بقت على أرض الواقع، ساعتها بنسي الإحباط ده أكيد.
اللي ساعدني في الفكرة فنانين كتير وكلهم بيعانوا من مشكلة المركزية، زي هشام عمار المخرج وسراج الدين المصور والدرامر أحمد مصطفي اللي نقل الدرامز من بيته علي حسابه الخاص لموقع التصوير لمجرد فقط إيمانه بالفكر، وشارك أيضاً في الحملة تسنيم محمد ومروان بركات وسلمي محمود وزياد الحضري وتقي الدين، وكلهم إشتغلوا على المشروع لفترة طويلة بدون أي مقابل مادي.
بعد نزول الحملة ورغم مرور شهر ناس كتير من محافظات مختلفة إبتدوا ينزلوا شغلهم على الهاشتاج، ولقيت أماكن ومراكز ثقافية عندها إستعداد إنها تستقبل الفنانين كدعم ليهم لإعتراضهم علي فكرة المركزية والتهميش اللي بتحصل للفنانين في المحافظات المختلفة.