أهم حاجة في العمل التطوعي انك تفيد الناس المتطوعة .. مينزلوش من البيت ويروحوا ويجوا ويستهلكوا من وقتهم ومجهودهم وساعات كمان من فلوسهم .. و في الاخر ميتعلموش او ميستفيدوش الاستفادة الكاملة .. وبالتالي كان حاجة مهمة جدا اننا نهتم أكتر بجانب اننا نضيف معرفة وعلم للناس ونهتم اكتر بشغف الناس في الحاجات اللي بيحبوا يتعلموها ,, لو واحد بيحب التصوير فـ يهمني انه يفضل يحب التصوير .. و يطور مهاراته في التصوير .. ولو حد بيحب التصميم و الجرافيك ,, يتمرن كتير و يشغل ايده ويتفتحله الباب انه يبدع .. غير كمان اننا كان يهمنا الناس اللي مبتعرفش تعمل حاجات معينة من الاصل زي التحدث امام العامة .. تتعلم ده و تكسر حاجز الخوف وتبدأ تتعلم ازاي تتكلم وهكذا ..
الحاجات دي محدش بيتعلمها من نفسه .. الحاجات دي بتيجي ببالنعرفة الأول .. و التدريب .. وع الوقت و المجهود وقدرات كل شخص بيبان تأثير التدريبات دي ايه .. غالبا مش شرط انك تكون سينيور و رقم واحد في أي حاجة و سيرتك الذاتية في ملفات و مجلدات عشان تكون واحد مننا .. يكفي انك يكون عند استعداد او أساس و تكون عايز تساعد وتتساعد .. تستغيد وتتعلم و في نفس الوقت متشبعش أبدا
التدريب بدأ من يوم 15/4 ليوم 5/5 وتوقفنا فترة بسبب الامتحانات .. ولما رجعنا بعد الامتحانات كانت فترة رمضان .. فقررنا اننا ننظم حدث صغير داخلي يخص الناس اللي في مجتمعنا وعيليتنا الصغيرة و يكون تطبيق علي تنظيمات و مجموعات عمل وكيميا و تفاعل بين الناس وبعضها .. ممكن ابقي اتكلم عن الفطار تحديدا كحدث جانبي .. بس بشكل عام احنا كنا بنتعمد نبتكر مواقف ومشاكل وصراعات داخل الشغل عشان نشوفوا الناس هتتعامل معاها ازاي ورد فعلهم ايه .. وكمان الازمات والمواقف .. كل حاجة كان معمول حسابها بحيث اقيّم الناس استفادت من التدريبات ولا لا ..
نصيحة لأاي حد قائم علي عمل تطوعي أو حتي ليه قرار او رأي .. الناس أمانة .. المتطوع ده ممكن يكون سايب أولويات وجايلك .. ممكن يكون محتاج وقته جده واهتمامه لحاجة تانية .. كان ممكن يستغل الوقت ده مع اهله او في مجال تعليمه او حتي شغله .. كان ممكن يعمل حاجات كتيرة اوي مفيدة .. فلو مش هتكون مصدر استفادة حقيقية للمتطوعين .. بلاش تطلب متطوعين .. ربنا هيحاسبك علي وقتهم .
بقلم: عمر الاسكندراني