بقلم: هبة رشدي
من بداية شغلي وأنا مش بعرف أجامل وأتكلم كتير وأبدأ أمدح في شغل وللاسف في حد استغل ده فيا واني ممكن أكون بتحرج اني اطلب حقي أو أمدح في شغلي وكان ساعات كتير بينسب المجهود ده لنفسه لدرجة اني كنت بحس اني بتظلم وأن شغلي ومجهودي مش واضح وان في ناس موجوده معايا ممكن تكون بتشتغل نص مجهودي بس بتعرف تسوق لشغلها كنت حاسة اني كدا شغلي مش هيتقدر صح فقررت اني لو أنا مش هقدر شغلي ومجهودي اكيد مفيش شخص تانى هيعمل كده
مع الوقت لقيت الناس فاهمه كويس الشخص إللي بيشتغل وعنده ضمير والشخص إللى بيعمل شو لنفسه وشغله وبس ولقيت فعلا محدش بينجح غير إللى بيعمل شغله بضمير الشخص اللي بيتكلم كتير بينجح وبيلمع لفتره بس مش طويلة. النجاح محتاج ضمير وقدرة على الشغل بجد وتقدير طبعا و جراءة في الدفاع عن حقي ومجهودي
لما بدأت ابقى مسئولة عن فريق شغال معايا قررت ان أهم حاجة بالنسبالى اني احافظ على الأشخاص دي، مجهودهم شغلهم وكمان تقديرهم لذاتهم واني هقدر الأشخاص إللي معايا، وقررت أن أي إساءة هيتعرضوا ليها كأنها إساءة شخصية ليا. كنت بحاول بكل جهدي ان التيم بتاعي يكون محمي ومتوفر ليهم القدر الكافي من الاحترام وخصوصا ان احنا بنتعامل بشكل يومي مع العملاء وفي كتير ساعات بيبقى أسلوبهم مستفز وفي الحقيقة مخسرتش أي عميل من وقت القرار ده بالعكس كنت بحس أكتر باحترامهم وتقديرهم وحتى الموظفين الموجودين كانوا بيقدروا جدا ده وممكن يكون بيحافظوا وبيقدوا المكان إللي مقدملهم القدر الكافي من الاحترام والأمان
معظم الوقت بيتصدرلنا فكرة ان الشغل مفيهوش عواطف ولا مشاعر، واني لازم أكون صارمة جدا وساعات ممكن يوصل للجحود عشان أبقى بروفيشينال. بالنسبالي الشغل عبارة عن علاقات إنسانية كتير وتقدير وحب ورحمة، وطبعا أوقات لازم نبقى صارمين في مواقف معينة. بس الأهم إن يكون في رحمة حتى في العقاب مع إللي بيغلط علشان يبقى في تقدير للكيان إللي بيشتغل فيه وفي راحة نفسية في التعامل واحترام