صحافة: حبيبة رحومة
ازاي جاتلك فكرة “مفكرة“؟
لما كنت في آخر سنة في الكلية – كلية فنون جميلة – سنة 2012 كنت بحب أرسم أشخاص زي بتاعة الليلة الكبيرة (الغازية وشجيع السيما) فبعد ما خلصت الكلية قلت أستغل الشخصيات دي في براند تجاري فعملت مفكرة، و أو نوتبوك.. عملتها كانت في كولكشن اسمه: المولد
ليه اتجهت للعمل الخاص؟
أنا جرافيك ديزاينر وبحكم شغلنا بنعمل حاجات كتير برة الشغل ومقتنع إن الشغل الخاص أحسن من شغل الشركات، أينعم الشغل الخاص في مخاطرة أكتر بس بالنسبالي ممتع ومليان طموح أكتر
ايه الصعوبات اللي قابلتك مع تنفيذ فكرة مفكرة وإزاي عدتها؟
الصعوبات في الأول هما جزئين أولهم التسويق: إزاي أعرف أسوق المنتج بتاعي، تاني حاجة: الإنتاج وهو إزاي أقدم جودة حلوة وبسعر مناسب للناس
وتغلبت على ده ب إني أخدت كورسات أونلاين والموضوع كان سهل جداً ومش معقد من أول دراسة الجدوى وإزاي تعمليها لحد وازاي توصل للتارجت بتاعك وبحكم شغلي في الدعاية
أما الانتاج فدي كانت المشكلة الأصعب بس اللي ساعدني فيها والدي لأنه عنده خبرة كبيرة في مجال الدعاية والتغليف
ازاي اخترت الناس اللي شغالة معاك؟
من 2012 لحد 2015 كنت بشتغل لوحدي بس صعب ان الواحد يعمل كل حاجة لوحده طبعا، التيم دلوقتي عبارة عن 5 أشخاص وكلهم إضافة لمفكرة والاختيار بيكون للشخص اللي حابب مفكرة وفعلاً جاي عشان يطور، تاني حاجة هي الإبداع والأفكار التسويقية الجديدة
مؤخراً في ظل وجود العديد من الـ”Startups“، شايف ان ده نجاحه هيكمل ولا هتكون فترة و هتعدي و الناس ترجع تاني لشغل المكاتب؟
أنا فخور بكوني جزءاً من الـ”Startups” في الإسكندرية، ودلوقتي موجودين في مصر والشعودية وتونس وقريب هنكون في قطر والأردن ورغم إن اللي بيبدأ مشروع جديد مش بيكون عنده إمكانيات كتير بس طموحه أكبر من كل حاجة، مش لازم يكون معايا فلوس كتير عشان أبدأ مشروع.. دايما بقول الكلمة دي لأي حد بيبتدي مشروع
هنتصح الناس اللي بتفكر تبدأ مشروعها الجديد ب ايه؟
كل حاجة بتيجي واحدة واحدة.. في الأول كنت شايف إن الموضوع هيوصل بس لصحابي ومكنتش متخيل إننا هنكون برة مصر والناس تشوفنا هناك
كمعلومة مصرية أصيلة “ولاد فنون جميلة مش بيلاقوا شغل”، ازاي تغلبت على ده وهل مريت بلحظة في حياتك فكرت فيها في دراسة حاجة تانية؟
المشكلة أن أغلب الأقسام فنية جدا وملهاش شغل واضح زي مثلا النحت والتصوير وده خلاني أدخل جرافيك لأن نسبة إني ألاقي شغل أكبر من التانين، دراسة الجرافيك فادتني جدا في الجزء الإبداعي لمفكرة ومع شوية مذاكرة على الإنترنت وخبرة بكتسبها يوم بعد يوم قدرت أفهم شوية في التسويق ولسة طبعا بذاكر، فلازم أي حد بيبتدي مشروع يدرس السوق كويس وميستهونش بده لانه هيفيدوا بعدين جدا
هل شغلك في السوق خلاك تتخلى عن ميليس الديزاينر وتواكب مطالب السوق وتركن الفن على جنب شوية؟
لا طبعاً لأن العميل محتاج يشوف أفكار جديدة ووظيفة أي مصمم إنه يبتكر سواء في الإنتاج أوالتصميم ويكون بيضيف عن أي شخص تاني
أضافت ايه “مفكرة” لشخصيتك؟
كتييير، أهمهم إن بقى عندي طموح أكتر إني أعمل حاجات كتير قدام إن شاء الله
مين مثلك الأعلى؟
مثلي الأعلى بالنسبة إلى المفكرات هو هاني محفوظ، هو أول شخص صنع شيئاً إسمه مفكرة مكتوبٌ عليها صنع في مصر، وأول من فكَّر في فكرة علاقة الفن بالجزء التجاري، وهذا مهم جداً
عامة وبالنسبة إلى “مفكرة”، ايه الأقوي، التسويق في السوق أو على وسائل التواصل الإجتماعي؟
على السوشيال ميديا دلوقتتي الواحد بيقدر يوصل لكل الناس بسهولة، الماركت مهم بس العلام كله اتجه دلوقتي للديجيتال
بماذا أثر فيك وجودك في معمل[1]؟
معمل بيتي التاني، فادني إني إتعرفت على ناس كتير عندهم نفس طموحي وناس كتير ساعدتني هناك عشان المشروع ينجح، مهم جداً إنك تكون في مكان فيه ناس مبدعين كتير وأكيد هيكون ليه تأثير كبير وأنصح ناس كتير إنها تجرب معمل
[1] معمل هو مساحة عمل مشتركة توجد بالإسكندرية
https://www.facebook.com/mofkera/?fref=ts
